Өркөн өй өрөгөйүн оонньуута

Төрөөбүт төрүт тыл хас биирдии киһиэхэ, оскуолаҕа үөрэнэр оҕоҕо, сиртэн саҥа быган эрэр кыракый киһиэхэ тиийэ, кини сайдар - үүнэр кэскилин быстыбат утаҕа, силигилии чэлгийэр дириҥ силиһэ буолар. Норуот үйэлэр тухары мунньуллубут муудараһын, олоҕун уопутун төрөөбүт тылыгар сөҥөрдөн илдьэ сылдьар. Төрөөбүт тыл, култуура үтүө үгэстэрин, бараммат баай уратыларын хас биирдии үүнэр ыччакка тиэрдии, үөрэтии – биһиги сүрүн сорукпут, энчирээбэт иэспит. Олунньу ый 17 күнүгэр И.М. Яковлев аатынан Покровскай 1№-дээх орто оскуолатыгар “Ийэ тылбыт этигэн кэрэтэ” –ийэ тыл күнүгэр аналлаах үөрэнээччилэр улуустааҕы бэстибээллэрэ ыытылынна. Бу тэрээһиҥҥэ оройуоннааҕы оҕо библиотеката «ҮРДҮККЭ КӨТҮТ, ТӨРӨӨБҮТ ТӨРҮТ ТЫЛЫМ» өркөн өй өрөгөйүн оонньуутун ыытта. Оонньуу 7 түһүмэҕинэн ыытылынна. 1 түһүмэх- Тыл оонньуута лексика 2 түһүмэх- Тыл оонньуута фонетика 3 түһүмэх - Суруйааччылары таай 4 түһүмэх - Саха литературата 5 түһүмэх - ”Хаҥалас” тургутук оонньуу 6 түһүмэх - Сиэри- туому төһө билэҕин? 7 түһүмэх- Таабырын хонуута Күрэх түмүгүнэн Тумул орто оскуолатын үөрэнээччилэрэ кыайыы өрөгөйүн биллилэр. Иккис миэстэҕэ И.М. Яковлев аатынан Покровскай 1№-дээх орто оскуолатын үөрэнээччилэрэ, 3 миэстэҕэ А.И. Притузов аатынан Уулаах – Аан орто оскуолатын үөрэнээччилэрэ буоллулар. Сахалыы сайаҕастык саҥарар, иэйиибитин истиҥник этинэр, Ийэ тылбыт үйэлэргэ сүппэккэ үүнэ-сайда турдун!

Дополнительные фотографии:  Загрузить / Загрузить / Загрузить / Загрузить / Загрузить / Загрузить